ငွေ = ဒုတိယဘုရားသခင်
လူတိုင်းငွေရှိဖို့လိုသည်။ငွေမရှိလျှင်လူရာမသွင်း လူတိုင်းငွေကိုချစ်သည် ငွေရဖို့ကြိုးစားအားထုတ်နေကြသည်။ ငွေရဖို့နည်း အမျိုးမျိုးနှင့်ကြံဆနေကြသည်။ အလုပ်လုပ်ခြင်းသည်လည်းငွေရဖို့၊ပညာသင်ခြင်းသည်လည်းငွေရဖို့၊ငွေရှိပါမှ တကယ့်ပျော်ရွှင်မှုအစစ်ကိုရရှိမည်။ လူတိုင်းအသက်ရှင်ဖို့ငွေလိုသည်။လူတိုင်းငွေရှာဖို့အသက်ရှင်နေကြသည်။
လွန်ခဲ့သည့်အနှစ်နှစ်ဆယ်ကျော် လောက်က ကျွန်တော့ခေါင်းထဲမှာသံမှိုလိုစွဲခဲ့သည့်အတွေးများဖြစ်သည်။ဒီလိုမြဲမြံအောင်လည်းဆယ်စုနှစ်တစ်ခုစာလောက်တွေးတောခဲ့ရသည်။ရိုက်သွင်းခဲ့ရသည်။လူတိုင်းငွေကိုချစ်သည်။ကျွန်တော်ကပိုပြီးချစ်သည်။ငွေမရှိသောဘသတွေကိုကျွန်တော်တကယ်ပဲစက်ဆုပ်မိသည်။ပျော်ရွှင်စရာနေ့ရယ်လို့တစ်နေ့မှမရှိ။နေ၀င်မိုးချုပ်တစ်နေကုန်အလုပ်လုပ်ရသည်။တစ်နေ့လုပ်လို့ရသည့်လုပ်အားခက တစ်မနက်ပင်မစားလောက်။ကျွန်တော့်မိဘများမှာအလွန်ဆင်းရဲကြသည်။အဖေကကြုံရာအလုပ်လုပ်သည်။အမေကဈေးရောင်းသည်။ကြွေးရှင်များကိုရှောင်ရင်းတိမ်းရင်းနဲ့နယ်တကာလှည့်လည်နေထိုင်ခဲ့ရသည်။ကျွန်တော့ကိုမွေးခဲ့သည့်ဇာတိမြို့ကိုပင်မမှတ်မိတော့။ကျွန်တော်တို့ညီအစ်ကိုကျောင်းကပြန်ခဲ့ချိန်တိုင်းအိမ်မှာအမေမရှိတတ်။သူများမိဘတွေလိုကျောင်းကိုလာကြိုဖို့ကျွန်တော်တို့မတောင်းဆိုခဲ့ကြပါဘူး။ကျွန်တော်တို့ဆန္ဒကအိမ်ပြန်ရောက်ရောက်ချင်းထမင်းစားချင်ကြသည်။တစ်နေကုန်လို့မှထမင်းနှစ်နပ်ပဲစားရသောကြောင့်ညနေကျောင်းဆင်းလျှင်ကျွန်တော်တို့အမြဲဗိုက်ဆာနေကြသည်။သို့သော်တစ်ညနေမှ ထမင်းစောစောမစားရ။ကျောင်းကပြန်လာတိုင်းမီးဖိုချောင်မှာအမေမရှိ။ကျွန်တော်တို့ညီအစ်ကိုအမြဲဒေါသထွက်ပြီးပိတ်ထားခဲ့သောမီးဖိုချောင်တံခါးကိုဆောင့်ကန်တတ်ကြသည်။"ဟော့ ဒီ အမေလည်းအိမ်တကာလှည့်ပြီးအတင်းပြောဖို့လောက်ပဲတတ်တယ် ဘယ်နေ့မှထမင်းစောစောမကျက်ဘူး" ဟုတ်တစ်ခါတစ်ခါပြောမိကြသေးသည်။တကယ်တော့အဆင်မပြေတဲ့ကျွန်တော်တို့အမေကဆန်နှစ်ဘူးသုံးဘူးအတွက်အိမ်တကာလှည့်ပြီးမျက်နှာငယ်ငယ်နဲ့လိုက်ချေးငှားနေရတာပါ။ကျွန်တော်တို့ကသာအချိန်မှန်စားချင်ကြသည်။အဆင်မပြေမှုများကိုတော့ ကျွန်တော်တို့ထည့်မစဉ်းစားတတ်ခဲ့ကြပါဘူး။အဖေကလည်းလုပ်အားကနဲနဲရတဲ့အလုပ်တွေလုပ်ရင်းကျွန်တော်တို့အိမ်ရဲ့စီးပွားရေးကိုမဖြေရှင်းနိုင်ခဲ့။ဘာတွေဘယ်လိုဖြစ်နေနေကျွန်တော်တို့ညီအစ်ကိုနေ့တိုင်းကျောင်းသွားရသည်။ကျွန်တော့်သူငယ်ချင်းတွေလိုမူလတန်းနဲ့တင်ကျောင်းနားပြီးအလုပ်လုပ်မည်ဆိုတော့ အဖေရောအမေရောခါးခါးသီးငြင်းခဲ့ကြသည်။ကျွန်တော်တို့ကိုပညာတတ်ကြီးတွေဖြစ်စေရမည်ဟုအမြဲကြုံးဝါးနေတတ်ကြသည်။ကျွန်တော့စိတ်ထဲမှာတော့ပိုက်ဆံရှာဖို့ပဲအမြဲတွေးတောနေတတ်သည်။ကျွန်တော့ရဲ့ရှင်သန်ခြင်းကိုပိုက်ဆံရှာရန်ဟုပဲ အဓိပ္ပာယ်ဖွင့်ထားခဲ့သည်။ပညာတတ်ကြီးဖြစ်ရမယ်ဆိုတဲ့အသံကြားတိုင်းကျွန်တော့စိတ်ထဲမှာတော့ ပုတီးကုံးကြီးလည်ပင်းမှာပတ်၊ ခေါင်းပေါင်းကြီးကိုပေါင်း၊မျက်စိမှိတ်တင်ပလ္လင်ခွေထိုင်ရင်းနဲ့ ဒီနေ့နေသာမယ် မနက်ဖန်မိုးရွာမယ် အခုပြဿနာတွေမကြာခင်ချုပ်ငြိမ်းသွားမှာပါ အဲလိုပြောတဲ့သူကြီးလို့ပဲပြေးပြေးမြင်မိသည်။ကျောင်းကထွက်လို့တော့မရခဲ့။ကျွန်တော်ဆယ်တန်းရောက်တော့အမေကအကြော်ကြော်ရောင်းနေသည်။အတော်အတန်ရောင်းစွံတဲ့အကြော်ဆိုင်လေးပါ။အဖေကတော့လယ်သမားကြီးတစ်ဦးရဲ့အိမ်မှာလခစားဝင်လုပ်နေသည်။အရမ်းပင်ပန်းကြပါသည်။ကျွန်တော့်မိဘတွေရဲ့အလုပ်အကိုင် ကျွန်တော့မိဘတွေရဲ့ဘ၀တွေကိုဘယ်တုန်းကမှကျွန်တော်မရောင့်ရဲ့နိုင်ခဲ့။ဂုဏ်မယူမိခဲ့။ဒီအခြေအနေနဲ့တင်ကျွန်တော့မိဘတွေပြုံးပျော်နိုင်ပေမဲ့ကျွန်တော်ကတော့မတင်းတိမ်နိုင်ခဲ့။ကျွန်တော်ခေါင်းထဲတွင် ငါတစ်နေ့ချမ်းသာရမည် ဆိုသောအစွဲကစွဲနေခဲ့သည်။အခုရေတွင်းတူးအခုရေကြည်သောက်ချင်ခဲ့သည်။သို့သော်ကျွန်တော်ရဲ့ရေတွင်းတူးချိန်ကလည်းရှည်ကြာခဲ့ပြီဟုထင်မိသည်။မှတ်မှတ်ရရ မွေးကတည်းကတူးလာခဲ့ရခြင်းဖြစ်သည်။ကျွန်တော်ဆက်ပြီးမခံစားနိုင်တော့။ကျွန်တော်ဆယ်တန်းအောင်တော့ဂုဏ်ထူးတွေပါခဲ့သေးသည်။ကျွန်တော်မခင်တွယ်ခဲ့ပါ။အမေကပြောတယ် 'ငါ့သား လူတစ်ယောက်ကို ကျွန်မသားလေးတက္ကသိုလ်စရိတ်အတွက်အလုပ်လုပ်နေတာပါလို့ပြောရတိုင်းပြောရတိုင်း အမေတစ်လအလုပ်လုပ်ရတဲ့အမောတွေပြေသွားတယ်' တဲ့။ဘယ်လိုပဲပြောပြော ပိုက်ဆံလိုချင်တဲ့ကျွန်တော်က ပညာရေးတွေကိုဘယ်လိုမှစိတ်မ၀င်စားခဲ့၊ ကျွန်တော်တက္ကသိုလ်မတက်ဖြစ်ခဲ့။အိမ်ကနေထွက်ပြေးလာခဲ့သည်။အလုပ်လုပ်ဖို့ငွေရှာဖို့ဖြစ်သည်။တော်တော်ဝေးဝေးကိုထွက်ပြေးလာခဲ့ခြင်းဖြစ်သည်။ဟိုး နိုင်ငံရပ်ခြားထိပဲဆိုပါတော့။ပိုက်ဆံရဖို့ ရသမျှအလုပ်အကုန်လုပ်သည်။ကျွန်တော့မိဘများကိုမပူမပင်ထားနိုင်ဖို့ကျွန်တော်ကြိုးစားခဲ့သည်။အရာရာကိုခေါင်းထဲမှထုတ်ထားခဲ့သည်။ခုဆိုရင်ငါးနှစ်တောင်ကျော်ခဲ့ပါပြီ။လောဘကြီးတဲ့ကျွန်တော်ကတော့သူများတကာရဲ့နိုင်ငံမှာအနိမ်ခံဘ၀နှင့်အလုပ်တွေကိုပျော်ပျော်ပါးပါးလုပ်ကိုင်နေသည်။ခက်ခက်ခဲခဲလုပ်ကိုင်နေသည်။ငွေရှိလျှင်ပျော်ပျော်နေနိုင်ပြီးမဟုတ်ပါလား။မနေ့ကမှ အိမ်ကိုဖုန်းဆက်အကြောင်းကြားခဲ့သည်။ဒီငါးနှစ်အတွင်းအိမ်ကိုမဆက်သွယ်ခဲ့။ဘွားကနဲထွက်ပေါ်လာပြီးအဖေနဲ့အမေကိုအကြီးကြီးဝမ်းသာစေချင်ခဲ့သည်။ကျွန်တော်ဖုန်းဆက်တော့အဖေရောအမေရောပြေးလာခဲ့ကြသည်တဲ့။ပြီးတော့စကားတွေမပြောနိုင်ကြဘူးငိုရှိုက်သံတွေကျွန်တော်ကြားနေရသည်။ 'အဖေနဲ့အမေကျွန်တော့ကိုခွင့်လွတ်ပါ ကျွန်တော်တို့ပျော်ပျော်ရွှင်ရွှင်နေနိုင်ပြီးကျွန်တော့်မှာပိုက်ဆံတွေတော်တော်များများစုမိနေပြီ ကျွန်တော်တို့မဆင်းရဲတော့ဘူး' ကျွန်တော်ကသာ ကိုယ့်ကိုယ်ကို သူရဲ့ကောင်းကြီးအသွင်နှင့် ကျွန်တော်လုပ်နိုင်တယ်ဆိုပြီးပြောနေမိသည်။ 'မသေကောင်းမပျောက်ကောင်းသားလေးရယ် အမေတို့ဘယ်လောက်စိတ်ပူနေမယ်ဆိုတာသားမစဉ်းစားမိဘူးလား မှန်တယ်အမေတို့မှာပိုက်ဆံမရှိဘူး မွဲတယ်သားတို့ကို အဆင့်အတန်းမှီမှီမထားနိုင်ခဲ့ဘူး အဲဒါအမေတို့ညံ့လို့ ဒါပေမဲ့သားရယ် အမေတို့ကိုပစ်ပြီးပိုက်ဆံနောက်ကိုလိုက်သွားတဲ့သားအတွက်တော့အမေတို့စိတ်မကောင်းဘူး မင်းအဖေဆိုစားမ၀င်အိပ်မပျော်နဲ့ သူညံ့လို့ဆိုပြီးစိတ်ထိခိုက်နေတယ် အမေတို့မှာမျှော်လင့်ချက်ဆိုလို့သားတို့ပဲရှိတာအမေတို့ဘ၀မှာသားတို့ကိုပဲလိုအပ်တာ မင်းအဖေရောအမေရောက်ပိုက်ဆံကိုချစ်မယ်ပိုက်ဆံနောက်ကိုလိုက်ခဲ့ကြမယ်ဆိုရင် မင်းအဖေနဲ့အမေနဲ့ချစ်ခဲ့ကြမှာလဲမဟုတ်ဘူး ကြိုက်ခဲ့ကြမှာလဲမဟုတ်ဘူး အိမ်ထောင်တွေဘာတွေပြုပြီးကလေးတွေဘာတွေမွေးခဲ့ကြမှာလဲမဟုတ်ဘူးသား ပိုက်ဆံနောက်ကိုပဲလိုက်နေကြရော့ပေါ့လူ့ဘ၀မှာငွေထက်တန်ဘိုးကြီးတာတွေအများကြီးရှိတယ်သား အမေတို့လိုချင်တာကသားရှာထားတဲ့သားပို့ပေးတဲ့ ပိုက်ဆံတွေမဟုတ်ဘူး သားတို့နဲ့အတူတူနေရတဲ့ပျော်ရွှင်မှုတွေ စုစုစည်းစည်းနဲ့ရုန်းကန်လှုပ်ရှားရတဲ့ဘ၀အဓိပ္ပာယ်တွေကိုလိုချင်တာအမေတို့ရဲ့ ဘာမှမကျန်တော့တဲ့အချိန်လေးမှာ သားတို့ကိုအရိပ်တကြည့်ကြည့်လုပ်ရင်းနဲ့ ကုန်ဆုံးစေချင်ကြတာ ပြန်လာပါတော့သားရယ် အမေတို့မိသားစုအတွက်ငွေလိုပါတယ် ငွေအတွက်နဲ့တော့ အမေတို့မိသားစုလေးကွဲကွဲပြားပြားဖြစ်သွားတာတော့အမေမလိုချင်ဘူး သားပြန်လာခဲ့တော့နော်'
ကျွန်တော်ငိုမိသည်။ပြီးတော့ဘာမှပြန်မပြောနိုင်ခဲ့။ကျွန်တော့ဆုံးဖြတ်ချက်တွေမှားလားမှန်လားကျွန်တော်မသိတော့ ပိုက်ဆံအတွက်ပဲစိတ်တွေကိုနှစ်မြုပ်ထားခဲ့သည်။မိသားစုရဲ့နွေးထွေးမှုတွေကိုကျွန်တော်လျစ်လျူရှုခဲ့မိသည်။ဘယ်လိုအခြေအနေတွေပဲဖြစ်နေဖြစ်နေ ပိုက်ဆံရှိတဲ့မိသားစုဘ၀မှာပျော်ရွှင်စရာတွေပဲပြည့်နှက်နေမည်ဟုကျွန်တော်ထင်ခဲ့မိသည်။ခုမှကျွန်တော့်ရင်ခွင်ကအေးစက်နေသလိုပဲ။အဖေတို့အမေတို့ရဲ အကြင်နာတွေမေတ္တာတွေ ကရုစိုက်မှုတွေနဲ့ဝေးခဲ့တာလည်းအတော်ကြာခဲ့ပြီပဲလေ။ ခုမှကျွန်တော့်ညီကိုလွမ်းမိသလိုပဲ သူရောဘာတွေလုပ်နေမလဲ သေချာတာတော့ကျွန်တော့်ထက်ပိုပြီးနွေးထွေးလုံခြုံနေမှာပါ။မိသားစုနဲ့သာနေရရင် ဆောင်းရာသီမှာတောင်စောင်မလိုဘူးမလား။ကျွန်တော်ကတော့ဒီမှာ တစ်ယောက်တည်း နွေခေါင်ခေါင်မှာတောင်စောင်ခြုံပြီးအိပ်နေရသည်။သေချာပေါက်ကျွန်တော်အိမ်ပြန်တော့မှာပါ။မိသားစုနဲ့ဝေးနေရတာအရမ်းအေးစက်ပြီးချောက်ချားဖို့ကောင်းတယ်လေ။အဖေတို့အမေတို့ရင်ခွင်မှာပဲ နွေးထွေးလုံခြုံတယ်။အပူအပင်ကင်းတယ်။ပိုက်ဆံအတွက်နဲ့နွေးထွေးတဲ့မိသားစုဘ၀လေးကိုအဆုံးရှုံးမခံတော့ဘူးဟုလည်းဆုံးဖြတ်ချက်ချလို်က်မိသည်။အသိုက်ကိုစုံကန်မိတဲ့ ကျွန်တော့ရဲ့ခြေထောက်တစ်စုံကိုတော့ အဖေနဲ့အမေခွင့်လွတ်ပေးပါနော်....
No comments:
Post a Comment